Проектот со наслов „Наоди“ предложен од ЈУ Младински културен центар – Скопје, ќе биде претставник на Македонија на 14-то издание на Интернационалната изложба на архитектурата во Венеција во 2014 година, кое ќе се одржува од 7 јуни до 23 ноември.
– Според одлуката на комисијата, која се базира на јасни и мерливи критериуми, проектот „Наоди“ е директен одговор на темата „Темели – прифаќање на модерноста: 1914-2014“ и во него е вградена индивидуална приказна за 100-те години од модерната, изјави денеска минстерката за култура, Елизабета Канческа-Милевска.
Според комисијата, проектот „Наоди“ е авторски приказ на специфичното просторно искуство на постоењето на градот Скопје, изразено преку адекватно одбрани фрагменти од недовршени промени низ времето, и авторите нудат креативно дело, базирано на сериозно истражување со професионално осмислена целовитост и јасно дефинирано рационално решение за реализација во просторот.
Во проектот ќе учествуваат повеќе архитекти, и тоа Д-р Јован Ивановски, Д-р Александар Радевски, М-р Ана Ивановска, Д-р Огнен Марина, Д-р Бојан Каранков, Владимир Десков и Горан Мицковски. Куратор на проектот е Д-р Јован Ивановски, доцент на Архитектонскиот факултет во Скопје, додека комесат на претставувањето М-р Златко Стефковски, директор на МКЦ.
Годинава, на конкурсот на Министерството за култура за претставување на земјата во Венеција, биле понудени вкупно три проекти, покрај „Наоди“ на МКЦ уште и проектот „Контрадикциите помеѓу брзиот развој на модерната архитектура“ на ЗЕМ-ЗЕМ ФЕШИОН Куманово, како и проектот „Карабина – прифаќање на модерноста, хибридизирање на реалноста“ на НУ Национална галерија на Македонија.
Министерката Канческа-Милевска испрати честитки и изрази уверување дека овој проект, достојно ќе ја презентира Македонија на Биеналето на архитектурата во Венеција.