Судечкиот совет на Апелациониот суд Скопје по вторпат денеска, уште не почната ја прекина јавната расправа по жалбата на неправосилно осудените екс премиерот Никола Груевски и поранешниот началник во МВР Ѓоко Поповски за набавката на мерцедесот од околу 600.000 евра.
Причина за прекинот на седницата е тоа што адвокатот на Поповски, Стерјо Зиков, во свое лично и во име на одбраната на Груевски побара иземање на судиите што постапуваат во овој предмет.
“Во името на одбраната на Груевски а и јас лично се потпишав бараме иземање на судечкиот совет”, рече Зиков.
Ваквото барање доаѓа откако судот не дозволи по втор пат за два дена да биде одложено судењето затоа што четворицата адвокати кои го бранат Груевски денеска се ангажирани како бранители на дел од обвинетите во слуачјот “27 април”.
“Поради тежината на казната за ова дело би замолил, во термин кој ќе биде усогласен да ми дозволите да ја образложам својата жалба. Ако мојот тим адвокати не се појавеше на другото рочиште ќе беа казнети како што тоа на понижувачки начин беше правено деновиве”, рече Груевски.
Судот го одби неговото барање со образложение дека странките биле навреме известени за терминот за денешното рочиште, а и поради тоа што вчера истото беше одложено.
“Тоа што одбраната на обвинетиот Груевски не е присутна на јавната расправа не е причина за одлагање на истата особено што судот му излезе во пресрет на обвинетиот Груевски и вчера ја одложи расправата за да може да ја даде својата одбрана”, рече претседателката на судечкиот совет Цветанка Периќ.
На Груевски не му помогна ни фактот што неговите адвокати утрово уредно го известиле судот дека нема да присуствуваат на јавната расправа пред Апелацискиот суд Скопје.
Донесувањето на одлукатадали ќе го иземе судечкиот совет се одложува за 13 часот, а од тоа зависи дали денеска ќе почне јавната расправа за случајот “Тенк” во кој Груевски е осуден на две години, а Поповски на шест и пол години казна затвор.