Виенскиот дневен весник „Пресе“ објавува дека поранешниот италијански министер за надворешни работи и еврокомесар Франко Фратини речиси сигурно ќе биде новиот генерален секретар на НАТО.
Потсетувајќи дека годинава ќе се одлучува за избор на нови личности на водечките функции во НАТО и ЕУ, весникот наведува дека како што се ближи времето за донесување на одлуките, така има и се повеќе кандидати, меѓу кои е и Фратини, кој веќе со месеци отворено се нуди за местото прв човек на Алијансата.
Меѓу кандидатите за шеф на НАТО, се споменуваат неколку „силни конкуренти“, како што се министерот за одбрана на Белгија, Питер де Крем, шеф на полската дипломатија Радек Сикорски или Германецот Томас де Мезиер.
И покрај „раниот старт“, Фратини најверојатно веќе победил во трката и неговиот избор во моментов се смета за речиси сигурен, наведува „Пресе“ повикувајќи се на дипломатски кругови.