Американски борбени летала биле подигнати за пресретнување на два авиона коишто навлегле во зоната на забранети летови на југот од Флорида, привремено воведен по повод престојот на американскиот претседател Барак Обама.
Информацијата ја пренесе телевизиската мрежа CNN, повикувајќи се на воени извори од американското министерство за одбрана.
Американската крајбрежна стража испратила хеликоптер и борбен авион од типот „F-16″ откако радарските системи регистрирале лет на мал авион од типот „Cessna 152″ над градот Палм Сити, околу пладне по локално време.
Авионот бил пресретнат и принуден да слета. Пет часа подоцна уште еден авион „F-16″ бил кренат по аларм поради навлегување во забранетата зона над Палм Сити, овојпат на авион двосед од типот „Lancair 320″. Приватниот авион овојпат бил предупреден да го промени курсот по што летал покрај забранетата зона.
Федералната управа за цивилно воздухопловство и американската тајна служба започнаа истрага за инцидентот, додава телевизиската мрежа.
Според локалните медиуми, Обама зел куса пауза од работата и заминал за Палм Сити каде што се релаксира играјќи голф.