Објавена е пресудата за пожарот во модуларната болница во Тетово во која на 8 септември 2021 година изгореа 14 луѓе, а десетици беа повредени.
Обвинети во овој случај беа поранешниот директор на болницата во Тетово, Флорин Бесими, поранешниот економски директор на болницата во Тетово, Артан Етеми, одговорниот за ковид центарот, Бобан Вучевски и тетовската болница како правено субјект.
Флорин Бесими и Артан Етеми се обвинети за дела против општата сигурност. Според судијата Јордан Велковски, тие предизвикале опасност за животот на пациентите и нивните роднини кои биле во болницата во критичниот момент.
Осудени се на казна затвор од 1 година и 6 месеци, но казната е условна, нема да одат во затвор ако во период од три години не сторат ново кривично дело. Осудени се и да платат парична казна од 4 000 денари.
Дежурниот доктор Бобан Вучевски кој беше обвинет за кривичното дело „непостапување според здравствените прописи за време на епидемија“ е ослободен од обвинение.
Тетовската болница треба да плати отштета од милион денари.
„Обвинетите, не поставиле пропишани уреди за заштита од пожар и со тоа предизвикале опасност за животот и телото за луѓето и пациентите болни со Ковид-19. Тие не постапиле според мерките и активностите од договорот за заем со Светска банка. Иако биле должни да имаат противпожарна опрема, на денот на пуштање во употреба на модуларната болница па се до настанување на пожарот немале соодветни уреди за заштита од пожар“, рече судијата во дел од образложението на пресудата.
ЈЗУ Клиничка Болница Тетово, пак, е обвинета за загрозување на општата сигурност и непостапување според здравствените прописи за време на епидемија.
Семејствата на загинатите пациенти Судот ги упати да бараат отштета преку граѓанска судска постапка.
За овој случај помагаа и експерти од Германија, а досега беше утврдено дека причина за пожарот е краток спој на продолжен кабел.
Во текот на судењето сведочеа родителите на 21- годишната пациентка зад чиј кревет избувнал пожарот. Татко и се обидел да го изгасне со влажно ќебе, но истиот се ширел многу брзо, по што едвај успеале да излезат од објектот. Тој немал дозвола да биде во болницата, но поради дијагнозата на нивната ќерка, церебрална парализа, секогаш морало да има некој покрај неа. Таткото рече дека предходните денови во ходникот забележал ПП апарат, но за кобната вечер не беше сигурен дали имало таков апарат.
Сведоците рекоа дека на влезната врата немало портир и вратата била отклучена поради што секој можел слободно да влезе иако импровизираната болница беше поставена за згрижување на ковид пациенти а болеста е високо заразна.
Судењето за пожарот во тетовската модуларна болница почна лани, на 7 декември.