Судијката Добрила Кацарска го осуди на деветгодишна казна затвор Ѓоко Поповски, поранешниот помошник министер за внатрешни работи за случајот „Триста“ односно за незаконски тендер за набавка на 300 патнички возила на МВР.
Поповски треба да ги надомести и судските трошоци, вештачења и проценки во висина од 29 милиони денари.
Судењето за овој предмет се врати на почеток, откако Апелацискиот суд ја укина првичната пресуда од 9 години затвор поради технички причини и го врати предметот на повторно одлучување во Кривичниот суд.
Триста: Ѓоко Поповски осуден на 9 години затвор
Според обвинението, Поповски кој бил овластен од тогашната министерка за внатрешни работи Гордана да ги спроведува постапките за јавни набавки , одлуката за јавна набавка на 300 патнички моторни возила ја донел во 2012.
Во огласот за јавна набавка како критериум била наведена економски најповолна понуда, и требало да го добие оператор со најповолна понуда, но тендерот бил манипулиран така што за набавка на патнички моторни возила добивале и петорангираните, четврторангираните и треторангирани понудувачи.
Комисијата наместо да изврши избор на економски најповолни понуда, во самиот тек на постапката ги изменила критериумите за јавни набавки. Еднаш утврден, критериумот не смее да се менува за цело време на јавната набавка, наведе Кацарска. Таа исто така рече дека Поповски не смеел да ја прифати одлуката на комисијата за јавни набавки и не можел да не знае за штетните последици.
Поповски веќе издржува казна затвор за случајот „Тенк“. Тој е осуден на 6 години и шест месеци затвор.
