Поранешниот помошник-министер за внатрешни работи Ѓоко Поповски е осуден на 9 години затвор за злоупотреба на службена положба и овластување во врска со јавната набавка на 300 возила за МВР, како и да ја надомсети штетата на МВР од 27.894.522 денари во рок од 15 дена од правосилноста на пресудата.
Исто така се задолжува и да надомести 246.523 денари судски трошоци во истиот рок.
Тој беше обвинет дека со јавната набавка го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.
Обвинителката на СЈО Фатиме Фетаи по изрекување на пресудата побара притвор за Поповски, имајќи ја предвид високата затворска казна што му е изречена, сумата што треба да ја надомести и поради тоа што тој е обвинет и во друг случај на СЈО, Тенк, за кој утре треба да биде изречена пресуда.
Фетаи рече дека поради ова постои опасност од бегство и тука го наведе случајот со двајцата бегалци Горан Грујевски и Никола Бошковски, за кои судот во грција не дозволи екстрадиција.
Тој беше обвинет дека со јавната набавка го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.
Бранителот на Поповски, Стерјо Зиков смета дека ниту еден основ за притвор не е издржан во моментот и покрај изречената превисока казна затвор.
-Обвинетиот и досега свесен за кривичните дела и за запретената казна уредно се јавуваше на судење. Според него, Поповски ни досега ни од сега нема да бега, дека е семеен човек со семејство во РМ, а и неговата здравствена состојба е сериозна. Поради тоа сметаме дека не треба судот да определи мерка притвор, рече Зиков и најави жалба на првостепената пресуда.
Адвокатката Сања Алексиќ напомена дека исто така и имотот на Поповски е замрзнат, на што судијката укажа дека оваа мерка се однесува само на период од 15 дена по правосилноста на пресудата.
Во своја одбрана Поповски рече дека ниту има можност, ниту потреба ниту сакам, ниту размислувал за бегство од државата.
-Сакам да напоменам дека кога беше изречена мерката за одземање на патната исправа, јас веднаш ги доставив двете патни исправи што ги поседувам. Во поглед на пријавањето секоја среда, се пријавивам. Јас алтеративна држава немам, освен оваа. Повредата на сопругата која јас и ја нанесов во несреќен случај предизвика тешка операција кај неа, движењето и е ограничено. Имаме еден син кој живее и се школува и стара неподвижна мајка која до пред еден месец живееше со мене, меѓутоа во неможност заради здравстените проблеми и психичката состојба во која се наоѓаме не можевме да и пружиме грижа и ја сместивме во дом за стари лица, каде секојдневно ја посетуваме, рече Поповски.
Судот даде пауза од 40 минути за да одлучува по барањето на СЈО за притвор.
СЈО бараше осудителна пресуда за Поповски за кривичното дело за кое е обвинет, за што е предвидена казна затвор од четири до 15 години и надомест на штета од над 27 милиони денари и судски трошоци.
Одбраната, пак, побара Поповски да биде ослободен од обвинението. Поповски пред Судот кажа дека не е виновен и оти постапката што се води против него сериозно влијаела на неговото здравје. Рече и дека во изминатиот период се соочил со многу закани, уцени и притисоци, но не прецизира од кого. Тој се пожали и дека му бил даден отказ од МВР во, како што наведе, сомнителна дисциплинска постапка.
Случајот се водеше по обвинителен акт на СЈО.