Претседателот на Собранието Талат Џафери денеска соопшти дека претседателските избори ќе ги распише на 8 февруари. Џафери вели дека според тоа, првиот круг од изборите ќе се одржи на 21 април, а вториот на 5 мај. Џафери вели дека првично било планирано првиот круг од изборите да се одржи на 14 април, а вториот на на 28 април, но бидејќи се совпаѓа со Велигден, изборите ќе се поместат за една недела подоцна.
Заедно со претседателските избори ќе се одржат и локални избори во три општини каде сега има в.д. градоначалници.
Заев и Ахмети до крајот на месецов ќе ги започнат разговорите за заеднички претседателски кандидат на изборите што треба да се одржат годинава.
Во ДУИ се убедени дека со СДСМ ќе се договорат за кандидат кој ќе биде прифатлив и за двете партии и кој реално ќе ja отсликува кохезивноста на општеството. Нашите убедувања се слични и лесно можеме да постигнеме договор за да имаме заеднички кандидат велат од ДУИ.
Претседателот на опозициската ВМРО – ДПМНЕ пред една недела изјави дека очекува победа претстојните претседателски избори иако партијата се уште нема официјален кандидат. Тој не откри дали и кој се пријавил на конкурсот за избор на претседател и дека кандидатот ќе биде избран по неговотo затвoрање, на 31 јануари, на партиска конвенција.
-ВМРО ДПМНЕ е парија која транспарентно се обраќа кон граѓаните и кон сите оние заинтересирани кандидати кои сакаат да аплицираат на конкурсот и кои ги исполнуваат условите, а се пропишани со закон. Ќе почекаме до 31 јануари кога јавноста ќе ги дознае имињата на тие што се пријавиле. Очекуваме заедно со пријавените кандидати и со оној кандидат што ќе биде избран на конвенцијата, ВМРО ДПМНЕ ќе понуди најдобра програма како што впрочем беше и во минатото. Јас очекувам голема победа на ВМРО ДПМНЕ на претседателските избори, изјави Мицкоски.
Мицкоски бара и предвремени парламентарни избори со претседателските
По изгласувањето на уставните амандмани во Собранието за имплементација на Преспанскиот Договор, Мицкоски побара заедно со претседателските да се одржат и предвремени парламентарни избори.
Заев, на прес конференција во саботата рече дека Мицкоски иако бара, „моли Бога тие да не се одржат, но рече дека бидејќи се работи за барање од лидерот на опозицијата во ваков момент, тоа барање ќе биде разгледано во највисоките партиски тела на СДСМ.
Од ДУИ пак велат дека не е за предвремени избори, бидејќи со тоа ќе се забави економските и рефермескиот процес во земјата.