Презентација на културните, археолошките и туристичките вредности на Македонија ќе се одржи денеска во Њујорк, во организација на светски реномираното списание „Археолоџи магазин“ кое има континуирана 65-годишна традиција во обработката и презентацијата на теми од областа на заштитата на културното наследство од целиот свет, и на Генералниот конзулат на Република Македонија во САД.
На настанот кој ќе се одржи во „Scandinavian house“ („Скандинавска куќа“) пред многубројните поканети гости од американската археолошка елита, туроператори и туристички агенции од САД, ќе се обрати министерката за култура Елизабета Канческа-Милевска.
На настанот, соопшти Министерството за култура, е предвидено и обраќање на Питер Хердрич, извршен директор на Археолошкиот институт на Америка, организација со 133-годишна традиција во заштитата на културното наследство која е издавач на реномираното списание „Археолоџи магазин“.
За најзначајните откритија во областа на археологијата во Република Македонија, предавање ќе одржи реномираниот професор, д-р Драги Митревски, од Филозофскиот факултет при Универзитетот „Свети Кирил и Методиј“ – Скопје, кој ќе се осврне на значењето на откриените наоди, како и вложувањата во областа на заштитата на културното наследство. Ќе биде прикажан и промотивен видеоматеријал со презентација на културното, археолошкото и туристичкото богатство на Република Македонија.
На настанот, македонската фолклорна традиција ќе биде презентирана преку настапот на Културно-уметничкото друштво „Свети Кирил и Методиј“ од Њу Џерси.