Владата на Република Македонија вчера повторно се задолжи и тоа во вкупен износ од 61,6 милиони евра.
Беа продадени шестмесечни државни записи во износ од 55,3 милиони евра, како и 5,2 милиони евра во едногодишни државни записи.
Кај државните обврзници, пак, беа понудени такви со рок на достасување од 5 години, а беше продаден износ од 1,1 милиони евра, што беше далеку под бараните 4,88 милиони евра.
Веќе денеска државата треба да врати 62,4 милиони евра од четири претходно одржани аукции, што значи дека овојпат нема да и остане ништо за дополнително трошење.
Она што е интересно во ова задолжување е што банките овојпат понудија помалку средства од оние што ги бараше државата.
Кај шестмесечните државни записи со девизна клаузула, побарувачката на државата беше помала за 9,85 милиони евра, а кај шестмесечните записи без девизна клаузула побарувачката на државата беше поголема за 7,26 милиони евра од понуденото. Ова значи дека кај државните записи Владата се задолжи за 17,11 милиони евра помалку од она што го бараше, а ако се додадат и непродадените државни обврзници во износ од 3,78 милиони евра, ова значи дека вчера Владата остана со 20,89 милиони евра помалку од она што го бараше.
Дали станува збор за нов тренд, во кој побарувачката на државата ќе биде помала од она што ќе го понудат банките или станува збор за исклучок од правилото банките најчесто да нудат повеќе пари од она што и треба на државата, рано е да се каже и ќе треба да се види како ќе се одвиваат следните аукции. Но, во секој случај државата неделава остана со 25 отсто помалку пари од она што го бараше.