По минатогодишното прочистување, годинава решивме сосема да ѝ се препуштиме на природата! Затоа што од природното поубаво нема! А ни поздраво!
Но што е денес природно? Дали е природна зависноста од Интернет или, пак, опседнатоста со технологијата? Дали е природно да се продава крв за да се заработи за леб? Дали е природно да се живее меѓу облакодери и билборди? Во одела и корсети? Среде финансиска криза? Меѓу идеологии?
„МакеДокс“ верува дека природно е да чувствуваме револт; да сакаме да си играме надворнаместо да пишуваме домашна. Природно е да живееме меѓу високи дрвја, длабоко во шумата, да гледаме нагоре кон ѕвездите или да свириме со листови. Природно е да се испитуваме однатре и да се трудиме да си останеме верни на себеси, па макар тоа значело и да се опивамесо вотка или да копаме по архивите. Природно е да возиме скејтброд дури и кога услови нема!Природно е да твориме! Сосема природно е и да се живее за филмот, независно што мисли владата!И токму во духот на таа природност и спонтаност, петтиот „МакеДокс“ носи едночудо прекрасни документарни приказни, кои од 16 до 20 јуни ќе ги раскажуваме во Куршумли-ан и МКЦ.
Најпосле, природно е да дојдеш на „МакеДокс“! Оти нема поприродно од јунскиот мирис на кромид низ Старата скопска чаршија!
Природно е и да се муабети! А за што друго ако не за филмови? Секое фестивалско претпладне од 10.30 д0 12.00 часот ќе се случува Утринското доку-кафе. МКЦ ќе биде домаќин на серија мастер класови, каде што ќе муабетиме за природно-креативните процеси кои се случуваат во утробата на присутните режисери. А потоа, природно, ќе следи и проекција на нивните филмови!