Во текот на насилните демонстрации синоќа во Приштина се повредени 21 полицаец и еден новинар, а пет демонстранти се уапсени, јави Танјуг.
Поради безбедносни причини полицијатата ги отстранила шаторите од централниот плоштад во Приштина, во кои претходните три дена кампуваа приврзаници на опозицијата. Поддржувачите на опозицијата бараат вонредни избори и не сакаат Хашим Тачи да биде претседател на Косово.
Демонстрантите кои биле со фантомки на глава нередите ги започнале нешто пред 17 часот кога со молотови коктели, шишиња со боја и камења почнале да фрлаат во правец на собранието, каде биле распоредени припадници на косовската полиција.
На три локации во Приштина, вклучувајќи и шатори во кои кампувале демонстрантите, полицијата пронашла 39 шишиња со молотови коктели и 38 шишиња со боја.
На почетокот на протестите, организирани во петокот во Приштина, биле присутни околу 2.500 демонстранти,соопшти косовската полиција.
Синоќа Тачи беше избран на претседател на Косово дури во третиот круг гласање во парламентот. Тој доби 72 гласа од 82 присутни пратеници. Опозицијата активира солзавец во Собранието за да го искажат своето незадоволство со предлогот за избор на Тачи.