Докторката Стојка Фуштиќ, специјалист за цистична фиброза, денеска на прес конференција во Министерството за здравство истакна дека утрово пристигнал лекот „Трикафта“ на Универзитетската клиника за детски болести и веќе ги примаат пациентите кои треба да ја започнат терапијата.
Според неа, на Клиника се примаат 6 пациенти, додека пак двајца пациенти кои се водат во критична состојба ќе бидат лекувани на Универзитетската Клиника за пулмологија.
„Очекуваме да започнеме со терапија овие денови, кај некои од утре, очекуваме позитивен ефект од терапијата во однос на подобрување на нивната белодробна функција, подобрување на квалитетот на животот, на нутритивниот статус, намалена зачестеност на хоспитализација и секако поактивен живот на овие пациенти“, порача Фуштиќ.
Таа додава дека се работи за 7 возрасни лица над 18 години и едно дете.
Докторката истакна дека се работи за годишна терапија, а пациентите ќе доаѓаат на Клиниката еднаш месечно со цел да ја земат.
„Тоа е таблетарна терапија. Примаат две таблети сабајле од комбиниран модулатор, и една таблета навечер од еден модулатор“, вели докторката.
И министерот за здравство Фатмир Меџити денеска на прес конференција посочи дека пациентите со цистична фиброза го добиле лекот „Трикафта“. Истиот го има на Универзитетската клиника за детски болести.
Според министерот, со ова е решен најгорливиот проблем на оваа категорија на граѓани.
„Пациентите се во фокусот на нашата работа, и во таа насока продолжуваме со нашите заложби. Во соработка со премиерот работиме на изнаоѓање решение за останатите засегнати со оваа дијагноза“, рече Меџити.