Откако просветниот инспектор Ѓорѓи Илиевски соопшти информации за незаконско унапредување во научни звања на сегашни владини функционери од редовите на ДУИ, врз него почнале да се вршат страшни притисоци на работното место.
-Директорот Томе Спировски веднаш откако ја обелоденив вистината започна со притисоците и мобингот врз мене – вели Илиевски.
Тој вели дека очекува да добие отказ, иако за шест месеци заминува во пензија.
Вчера беше одржана седница на Дисциплинска комисија при Државниот просветен инспекторат, каде што беше донесена одлука против Ѓорѓи Илиевски да се предложи дисциплинска мерка, за која директорот треба да одлучи во рок од 7 дена, дали ќе ја прифати или не.
Просветниот инспектор Илиевски се обратил до Хелсиншкиот комитет за човекови права, од каде ни потврдуваат дека е отворен предмет и дека е доставена документација за случајот.
-Фактичката состојба што тој ја има утврдено без разлика дали постапувал по стариот или по новиот закон не ја менува како таква – вели Уранија Пировска од Хелсиншкиот комитет.
-На министерот за образование додека му мирувал работниот однос се стекнал со наставно научно звање – појаснува Пировска.
Илиевски оди во пензија во јануари и тој е подготвен да оди до крај додека не се расчисти вистината.
-Не ми дозволија да ја искажам целокупната причина за да дојде до тоа јас да се појавам во медиумите и да ги доставам до државната антикорупција. На тоа реагираше и мојот адвокат и се тоа во присуство на член на Хелсиншкиот комитет и Народниот правобранител – вели просветниот инспектор Ѓорѓи Илиевски.
Тој предложл сведоци кој може да посведочат како се вршеле притисоците врз него, но тие сепак не биле сослушани.
Илиевски меѓу другото вели дека е спорно што ќерката на Африм Салиу, кој е раководител на сектор, работи на Тетовскиот универзитет, каде тој треба да врши инспекциски надзор и оценување на квалитетот на образованието.
Со вчерашната седница на Дисциплинска комисија при Државниот просветен инспекторат претседавала Валерија Анастасова.
Таа пред почетокот на седницата на новинарите им рече дека не им е дозволено да присуствуваат на седницата.
Потоа новинарите беа замолени да го напуштат и објектот, а не само седницата, на што реагираше Здружението на новинари на Македонија.




