Две лица се приведени во Холандија под обвинение дека се дел од мрежата која се обидела да ги измами властите во европски земји со продажба на непостоечка медицинска опрема, соопшти Европол.
Како што се наведува, кон средината на март германските здравствени служби ангажирале компании во Цирих и Хамбург за набавка на маски во вредност од 15 милиони евра. Бидејќи на глобалниот пазар постои недостиг на медицински материјали и вообичаените канали се затрупани, двете компании наоѓаат нови опции за купување и контактираат со луѓе кои наводно продаваат маски од Шпанија.
Тие добиле понуда за 10 милиони маски од оваа „компанија“, но потоа биле упатени на „доверлив“ ирски производител кој наводно може да обезбеди таква испорака.
Потоа ирскиот посредник ги поврзува со холандскиот снабдувач, кој дал гаранции дека може да ги обезбеди потребните 10 милиони заштитни маски.
Постигнат е договор за првична испорака на 1,5 милиони маски во замена за авансно плаќање од 1,5 милиони евра.
Купувачите му платиле пари на ирскиот посредник и започнале со подготовките за испорака, која требало да се транспортира во 52 камиони и со полициска придружба од магацин во Холандија до крајната дестинација во Германија.
Непосредно пред датумот на испорака, купувачите биле известени дека парите не пристигнале и дека на холандскиот снабдувач потребно е итно да му се уплатат 880.000 евра.
Купувачите дале пари, но маските никогаш не пристигнале.
Проверките покажале дека холандската компанија постои, но нивната страница е клонирана на интернет и притоа нема официјална кореспонденција со купувачите или какви било договори за продажба.
Кога разбрале дека се измамени купувачите контактираат со нивната банка во Германија и започнува меѓународната потрага по парите.
Со брза акција од страна на повеќе институции, прво британска банка преку која одела трансакцијата успева да го врати целиот износ од 1,5 милиони евра и да ја идентификува компанијата во Ирска која била дел од шемата за измама. Холандските власти успеваат да пронајдат дополнителни 880 000 евра кои веќе се пратени во Велика Британија, иако крајната дестинација требало да биде банкарска сметка во Нигерија.
Од Интерпол велат дека заедничката операција, спроведена во соработка со Интерпол и финансиските и други институции на Германија, Холандија, Ирска и Велика Британија, довела до првите две приведување и дека таа се уште е во тек.




