Кривичниот суд денеска одреди уште 30 дена домашен притвор за Здравко Савески и Владимир Куновски, членови на партијата Левица. Со оваа одлука обвинетите остануваат втор месец во куќен притвор поради обвиненијата за демолирање на народната канцеларија на Ѓорге Иванов.
-Со ваквата одлука уште еднаш се покажува дека правосудните органи се само маша, со која режимот ги извршува валканите работи. Не можејќи да ги исплашат нашите членови и со тоа да ги одвратат од протестирање, тие се решаваат на вакви очајни чекори. Паралелно со оваа одлука, во тек е и хајка на полициските служби кон протестирачите. Неколку наши членови беа запрени вчера на патот кон дома по протестот и беа легитимирани. Пред некој ден, две девојки беа следени од лица во цивилна облека на нивниот пат до дома по протестот, при што на груб начин, во тесен и темен премин, им било побарано да се легитимираат.
Нема дилема дека ова е дел од стратегијата на режимот, преку сеење страв, да проба да ги сузбие протестите. Но, нема да им успее, како што не им успеваше ни до сега!Ваквите мерки само не` прават посилни и го креваат револтот, што ќе резултира со уште помасовни протести.Со оваа одлука уште еднаш се покажува и неправичноста на нашиот правосуден систем. Додека политичари осомничени за тешки криминали се помилуваат, лица кои протестираат против ваквата одлука завршуваат во неверојатно долг куќен притвор. Ќе дојде времето на правдата! Многу скоро! И тогаш слугите на режимот ќе одговараат за сите нивни престапи! Ќе има правда, ќе има мир!, се вели во реакцијата на Левица.
Куновски и Савески се во домашен притвор од 25 април.