Бројот на бегалци припадници на муслиманскиот народ Рохинга, кои минуваат од Мјанмар во Бангладеш, секојдневно се зголемува, соопштија од ОН, при што само во последниве 24 часа регистрирани се нови 35.000 луѓе, објави Би Би Си.
Се верува дека од 25 август досега повеќе од 123.000 припадници на Рохинга избегале од насилството во државата Мекман во западен Мјанмар.
Камповите за бегалци во Бангладеш се преполни.
Во текот на изминатите недели запалени се повеќе од 2.600 домови во северозападниот дел на Мјанмар, во областа каде живеат Рохинга муслиманите, наведоа претставниците на УНХЦР.
Генералниот секретар на ОН, Антонио Гутереш, предупреди претходно дека судирите во Мјанмар можат да предизвикаат хуманитарна катастрофа.
Конфликтот започна по нападите на милитантите од Рохинга врз полициски станици, што предизвика контра акција на војската, што пак принуди илјадници цивили Рохинга да бегаат од од нивните села.
Рохинга се муслиманско етничко малцинство кое се соочува со прогон во Мјанмар. Бегалците сведочат дека војниците и бунтовниците од Рахин ги уништуваат нивните села и убиваат цивили со цел да ги протераат. Војската на Мјанмар пак, тврди дека се бори против милитантите наРохинга кои напаѓаат цивили.
Двата главни кампови на ОН во Бангладеш се полни, па луѓето спијат надвор или градат засолништа на отворено и покрај патишта. Многумина имаат потреба од храна и вода.
Засега е тешко да се добијат непристрасни извештаи за ситуацијата на теренот, поради ограничен пристап.
-Безбедносните власти треба веднаш да ги спречат сите форми на насилство таму и да обезбедат хуманитарна помош и помош за развој на краток и долг рок, изјави министерот за надворешни работи на Индонезија Ретно Марсуди.
Индонезија е една од неколкуте земји каде што има протести поради ова прашање. Пакистан и Малезија ги осудија, а Малдивите ја прекинаа трговијата со Мјанмар. Турскиот претседател реџеп Таип Ердоган побара од Су Ки, која де факто е лидер во Мјанмар, да го покрене прашањето за кршењето на човековите права, објавија турските медиуми.
Во понеделникот, висок официјален претставник на ОН за човекови права исто така побара од Су Ки да ги заштити припадниците на Рохинга.
Су Ки, добитник на Нобеловата награда за мир, која со години беше во домашен притвор за нејзиниот продемократски активизам, е под зголемен меѓународен притисок да ја осуди акцијата на армијата, но се соочува со моќна војска и со јавноста во Мјанмар кои во голема мерка се непријателски расположени кон припадниците на Рохинга.
Се чини дека многу е тешко да се пронајде држава што би ги прифатила, бидејќи Мјанмар не ги смета за свои државјани, а и Бангладеш, каде веќе има згрижени илјадници бегалци, го дели истиот став.