Собраниската Комисија за политички систем и односи меѓу заедниците денеска треба да ја продолжи расправата за Извештајот за активностите на Специјалното јавно обвинителство (СЈО) за вториот шестмесечен период од постоењето на ова Обвинителство, во периодот од 15 март до 15 септември годинава.
Комисиската расправа за Извештајот на СЈО почна во средата минатата недела.
Во петокот расправата беше прекината поради приватни обврски на специјалната јавна обвинителка Катица Јанева.
Според координаторот на пратеничката група на СДСМ Горан Сугарески, одолговлекувањето на расправата за Извештајот на Јанева е со цел никогаш да не стигне на дневен ред извештајот на државниот обвинител Марко Зврлевски кој исто така е на дневен ред на собраниската комисија.
Координаторот на пратеничката група на ВМРО-ДПМНЕ Илија Димовски смета дека опозицијата влегува во операција „бегство“ со цел да се обиде да ја спаси Јанева од отчетност.
Во целиот тек на маратонската расправа по Извештајот на Јанева имаше бурни реакции. Власта бараше Јанева да го образложи и финансискиот Извештај по ставки, бидејќи според нив постои сомнеж за околу милион ипол евра искористени пари од СЈО во нејасни цели.
На дневен ред на Комисијата е и Годишниот извештај за работата на Јавните обвинителства во Република Македонија за 2015 година.
Претходно, за денеска напладне беше закажана пленарна седница на чиј дневен ред се двата извештаи.