Собранието денеска ќе ја продолжи конститутивната седница на која се дебатира за избор на претседател, заменик на претседателот, членови и нивни заменици на Комисијата за прашања на изборите и именувањa. За претседател на Собранието е предложен пратеникот Талат Џафери од ДУИ.
Досега од пријавените 51 пратеник за дискусија, правото на збор го искористија само тројца пратеници. Утврдувањето на предлогот за состав на Комисијата за прашања на изборите и именувањата, е предуслов за избор на претседател на Парламентот.
Пратениците од ВМРО-ДПМНE вчера ги повторија барањата, јасно да се каже што е договорено со ДУИ, но и да се отфрли Тиранската платформа. Според ВМРО-ДПМНЕ, единствен излез од политичката криза е одржување предвремени парламентарни избори заедно со локалните.
Пратениците од СДСМ, побараа да не се крши Деловникот. Тие велат дека дебатата треба да се фокусира на точката на дневниот ред и да се остави за секое прашање да се дебатира кога ќе дојде време за тоа.
Конститутивната собраниска седница, почна на 30 декември 2016 година, но беше прекината, бидејќи не беше обезбедено парламентарно мнозинство за избор на претседател на Законодавниот дом.