Дождот не ги спречи работниците од скопска Леарница и денеска да излезат на протест пред Собранието, Министерството за правда и Владата.
Овие луѓе речиси еден месец преку протест алармираат дека фирмата во која работат го крши Законот за работни односи и бараат државата да преземе санкции бидејќи немаат земено 12 плати, а во последната година не им се исплатени ниту придонеси.
Двајцата претставници на штрајкувачите минатата недела беа примени на разговор во Влада, но до денеска оттаму нема никаков одговор на апелите на вработените во МЗТ Леарница.
-Од Владата рекоа дека инспекторите се на терен, но досега ние немаме добиено никаква информација. Работниците се приморани да стојат на штрајк, што друго би правеле? Не не плашат ни заканите од раководството, ниту лошите временски услови, вели за НОВА, Љупчо Чекаловиќ од Синдикатот на вработените во Леарница.
Штрајкувачите велат дека неправилно раководење со фирмата констатирала и Управата за јавни приходи (УЈП) по нивна пријава, но засега не е познато дали ќе следуваат санкции. Од УЈП за НОВА велат дека е во тек даночна постапка за која не смеат во моментов да се споделуваат информации со јавноста.
Според раководството пак, платите доцнат поради проблемот со ниското остварување на бизнис планот и злоупотреба на работните места.
-Одборот на директори и менаџментот јасно им ставија до знаење на Синдикатот и вработените дека времето на неодговорност, некомпетентност, уцени, манипулации е завршено, дека ќе дојде нов инвеститор кој ќе изврши строга селекција на сите вработени по сите основи и дека само оние што можат да ги исполнат строгите критериуми и ќе бидат во можност да ги исполнат плановите по обем, рок и квалитет, ќе можат и понатаму да работат во МЗТ Леарница АД Скопје.Значи главниот проблем е вониското остварување на бизнис планот, се вели во соопштението испратено во медиумите.
Вработените прашуваат доколку не ги извршувале работните задачи и вршеле злоупотреба зошто досега никој не е казнет за тоа.
-Смешен извештај, како ние сме биле, неработници и крадци, и да имало такво нешто тоа е должност на работодавачот, досега никој не е казнет за крадење и недобро работење. Месец дцена чекаат да дадат таков извштај кажува за самите нив со кој имаме работа затоа и фирмата е дојдена до тоа ниво, вели Чекаловиќ.
МЗТ Лерница е акционерско друштво во приватна сопственост. Протестите продолжуваат.