Протестите иницирани од граѓанското движење „Протестирам“ се прошируваат низ повеќе делови од Македонија.
Веќе втора недела се протестира по одлуката на претседателот Ѓорге Иванов за колективна аболиција на 56 лица, а по Скопје, Битола, Велес, Куманово, Струмица и Штип, денеска за прв пат протести ќе се одржат и во Прилеп и во Кочани.
Има најави за протести и во Охрид, Кавадарци (утре) и Гостивар (задутре).
Во тек се координации и за одржување на протести и во други градови низ Македонија.
Исто така, за утре е најавен протестен собир во Охрид, а задутре во Гостивар. „Протестирам“ вчера пред Собранието во Скопје за прв пат соопшти дополнети и проширени барања, согласно новиот развој на настаните и поканата што стигна од Јоханес Хан за лидерска среба в петок во Виена.
Од движењето #Протестирам велат дека преку протестите се бара итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО). Понатаму, тие бараат итна и неотповиклива оставка на Ѓорѓе Иванов од функцијата Претседател на Република Македонија; Произнесување на Уставниот суд за уставноста на СЈО; Формирање на специјално одделение на Кривичниот суд, кој ќе биде надлежен за случаите под јурисдикција на СЈО; Итно повлекување на одлуката за одржување на парламентарни избори на 5 јуни; Задолжително вклучување и присуство на независни претставници на граѓанското општество во процесот на решавање на кризата, како и формирање на преодна влада која докрај ќе ги имплементира итните реформски приоритети од извештајот на Прибе.