Холивудскиот магнат Харви Вајнстин е обвинет за силување и неколку други обвиненија за сексуална злоупотреба на две жени.
Претходно денеска Вајнстин и се предаде на полицијата во Њујорк.
Десетици жени го обвинија Вајнстин, некои за силување, некои за сексуален напад.
Шеесет и шест годишниот Вајнстин ги негира наводите за присилен секс. Ова се првите обвиненија изречени против него.
Во изјавата од полицијата се наведува дека Вајнстин “бил уапсен, обработен и обвинет за силување, сексуална злоупотреба и сексуално малтретирање за инциденти кои вклучуваат две жени”.
Во изјавата полицијата им се заблагодари на “овие жени за нивната храброст да излезат и да бараат правда”. Се уште нема детали за жените кои го обвинија.
Наводите против Вајнстин го поттикнаа движењето #MeToo, (#СегаКажувам) чија цел беше да да го сврти вниманието кон распространетост на сексуалната злоупотреба и вознемирувањето.
Кој се го обвини Вајнстин?
Холивудскиот магнат се соочи со обвинувања за сексуално малтретирање и напади од десетици жени. Некои тврдеа дека биле силувани.
Меѓу нив се актерките Кејт Бекинсејл, Лисета Ентони и Гвинет Палтроу.
Актерката Ешли Џад го тужи 66-годишниот холивудски продуцент, тврдејќи дека и ја уништил кариерата откако таа го одбила неговиот непристоен предлог.
Италијанскиот модел Амбра Батилана го обвини Вајнстин дека ја напднал во 2015 година. Сепак истрагата одлучи да не поднесе обвинение против него, иако имало аудио снимка на која Вајнстин признава дека ја фаќал за градите. Тој тогаш вети дека нема да го повтори тоа.
Обвинителите во Лос Анџелес разгледуваат неколку обвинувања против Вајнстин, а полицијата во Лондон спроведува истрага занаводна за сексуална злоупотреба.
Почетокот на крајот на Вајнстин
Ваквите наводи му нанесоа голема штета на неговата кариера.
Минатата година тој прво беше отпуштен од неговата продуцентска компанија Вајнстин компани, која подоцна и банкротираше.
Цела индустрија го осуди, а Академијата која ги организира Оскарите го исклучи од членството.
Дел од оние кои го обвинија Вајнстин, по денешното обвинение, ја поздравија одлуката на судот во Њујорк.
Харви Вајнстин – падот на кариерата на еден моќен филмски продуцент
Актерката Роуз МекГован напиша дека некои жени се откажале од надежта дека ќе има обвинение.
-Пред дваесет години се заколнав дека ќе ја исправам неправдата. Денеска ние сме еден чекор поблиску до правдата, рече таа.
Италијанската актерка Азија Арџендо, која тврди дека била жртва на Вајнстин во 90-тите, реагираше на Твитер, пишувајќи кусо: “Бум”.
Случајот Вајнстин и # MeToo
#MeToo кампањата против сексуалното вознемирување и злоупотреба започна есента минатата година во Холивуд, по обвинувањата против Вајнстин.
Движењето беше поттикнато од повикот на актерката Алиса Милано на Твитер, која побара од оние кои биле сексуално малтретирани или нападнати да одговорат со овој хаштаг. За 24 часа, таа добила половина милион одговори.
Но, “Me Too” како идеја датира уште од 2006 година, кога активистката за права Тарана Бурк, ја користеше како име за група која им помагаше на оние кои биле сексуално малтретирани и нападнати.
Во јануари повеќе од 300 актерки, писатели и режисери го започнаа проектот Time Up, со што за само еден месец собраа 21 милион фунти за да финансираат правна помош за луѓето кои се жртви од малтретирање, злоупотреба или напад на работното место.
Голем број личности од шоу бизнисот се соочуваат со обвиненија како Вајнстин. Во четвртокот американската филмска ѕвезда Морган Фримен се извини по обвинувањата за сексуално малтретирање.