По повод 200-годишнината од раѓањето на големиот германски композитор Рихард Вагнер Гете-институт Канцеларија за врски Скопје во соработка со Македонската филхармонија, Кинотеката на Македонија, НУ Центар за култура – Битола и Друштвото за германско-македонско пријателство и соработка, Битола го прикажува филмот „Рихард Вагнер“ (со музичка придружба на Македонската филхармонија).
Филмот во Скопје ќе биде прикажан во киното Милениум на 5 декември во 20:00 часот, а во Битола на 6 декември.
Филмскиот концерт во Македонија ќе го изведе Македонската филхармонија под водство на диригентот Хелмут Имиг, еден од најзначајните германски експерти за аранжирање филмски концерти. Хелмут Имиг ја адаптираше за оркестар оригиналната музика од Џузепе Бече.
Со оваа изведба се продолжува низата историски филмски концерти иницирани од Гете-институт, Кинотеката на Македонија и Македонската филхармонија посветени на значењето и зачувувањето на европското аудио-визуелно културно наследство.
Биографскиот филм настанал во 1913 г. по повод 100-тиот роденден на големиот композитор и раскажува за животот на Рихард Вагнер во манирот на „живи слики“ (tableaux vivants’).
Оскар Местер, еден од најагилните филмски продуценти во областа на германскиот нем филм, во 1913 г. добил идеја да направи филм за животот на Рихард Вагнер. Така настанал првиот филм кој ги отсликува сите позначајни моменти од животот на композиторот – почнувајќи од неговите студии и првото вработување во театарот во Бад Лаухштед, успехот и неуспехот во Дрезден, па се до поддршката од кралот Лудвиг II, кој го поддржувал до крајот на животот. Рихард Вагнер е првиот биографски филм во германската филмска историја, а воедно и прв филм за кој е напишана филмска музика во Германија.
По повод 200-годишнината од раѓањето на Рихард Вагнер ова 100 години старо филмско дело е повторно достапно благодарение на верзијата реконструирана од страна на Фондацијата Фридрих Вилхелм Мурнау и ЦДФ/АРТЕ: појдовен материјал за овој обемен проект била реставрираната филмска копија од Холандскиот филмски институт EYE каде биле сочувани две историски виражирани нитратникопии. Со неговиот реконструиран хроматизам филмот делува како патување низ илузионистичкиот театар на 19 век. Заедно со филмот, реконструираната е и оригинална музика од Џузепе Бече.