И сега имаме ситуација: „си го баравте- гледајте“! Од една страна, омикрон со крупни чекори ја освојува планетава! Од друга страна, вирусот на инфлуенцата (грипот) се бори за место под сонцето! И сега имаме ситуација кога сѐ почесто ќе се јавуваат комбинирани инфекции. Ништо спектакуларно! Сосема нормален развој на настаните!, вели проф д-р Даниловски за НОВА ТВ
Бројот на заразени експлозивно ќе расте! Но, бројот на хоспитализирани нема да ја следи таа динамика – ниту на умрени…, изјави денеска за НОВА ТВ проф. д-р Драган Даниловски, епидемиолог, по големиот број на новозаразени со ковид-19.
Институтот за јавно здравје денеска објави дека се регистрирани 1.197 нови позитивни случаи на ковид-19, што е значително повеќе во однос на изминатите денови, а потврди и деветмина инфицирани со омикрон сојот во земјата. Вкупно 15 лица ја изгубиле битката со вирусот.
– Останувам на својот став искажан прв пат уште на 28 ноември, кога омикрон се ширеше само во Јужна Африка: Бројот на заразени експлозивно ќе расте! Но, бројот на хоспитализирани нема да ја следи таа динамика – ниту на умрени… Ова ќе биде масовно здобивање со природен имунитет – природна „трета“ (или „четврта“) доза на имунитет против короната. Исходот ќе биде – збогување со пандемијата на ковид во Македонија напролет!, нагласува проф. д-р Даниловски.
А во врска со новиот сој, флурон, кој, по Израел, се појави и во Хрватска, и имаме ли дополнителна причина да бидеме загрижени од инфекција со истиот, во кој е истовремено присуството на ковид-19 и вирусот на грип тип А, односно сој на свински грип Х3Н2, тој објаснува:
– Воопшто не е за изненадување што се регистрираа и комбинирани инфекции на ковид и грип! Со рестриктивните мерки против ковид, минатата година, грипот како да беше потиснат. Но, годинава, откако се релаксираа мерките… и вирусот на грипот – секогаш притаено присутен – ја виде својата шанса! Му помогна, во голема мера, драстичниот пад на вакцинацијата против грип! И сега имаме ситуација: „си го баравте- гледајте“! – вели д-р Даниловски.
Тој додава:
– Од една страна, омикрон со крупни чекори ја освојува планетава! Од друга страна, вирусот на инфлуенцата (грипот) се бори за место под сонцето! И сега имаме ситуација кога сѐ почесто ќе се јавуваат комбинирани инфекции. Ништо спектакуларно! Сосема нормален развој на настаните! – категоричен е д-р Даниловски.
Љубица Балабан