Невладината Цивил го објави почетокот на проектот „Проговори“ за јакнење на јавната свест и солидарноста за човекови права и слободи.
Независните уметници и интелектуалци во наредните месеци ќе се претстават со дела кои се поглед во состојбите и процесите во општеството.
Во продолжение го пренесуваме Манифестот со кој иницијаторите ги повикуваат македонските уметници и автори да се вклучат
Проговори! Манифест
Визуелни уметници, писатели, поети, музичари,
филмаџии, актери, изведувачи и уметници од сите видови,
креативни луѓе, признати и непризнати,
тие што создаваат уметнички дела и тие што се обидуваат,
тие што користат познати алатки и жанрови,
тие што користат неконвенционални алатки, материјали и медиуми,
тие што користат воздух, вода, земја и оган,
тие што ги користат ѕидовите и бетонот, како и тие што користат платно, хартија или камера,
дојде време!
Проговорете!
Уметници, креативни луѓе, новинар(к)и и активист(к)и од сите бои, жанрови, ориентации и стилови; мултимедијалци, сликари, филмаџии, диџеи, поети, тату уметници, актери, фотографи, изведувачи, музичари, пејачи, аматери, професионалци, графити уметници, танцувачи, слемери, дизајнери, писатели…
Вие сте носители на пораката на слободата. Проговорете!
Уметниците се тие што го креираат огледалото на овој свет, ултимативните сведоци на настаните. Уметниците се свеста на општеството и ја обликуваат душата на културите и цивилизациите.
Уметноста е спиритуалното, инстинктивното и интелектуалното огледало на светот. Времето е хаотичен и бесмислен след на настани до мигот кога уметноста го ре-креира во разбирлива приказна. Уметноста го наградува животот со смисла; ѝ дава содржина на неподносливата апсурдност на постоењето.
Постоењето е неподнослива празнина, уметноста е факт.
Иднината е визија и визијата е уметност.
Од мигот кога првиот човек остави трага од нејзината/неговата дланка на ѕидот на пештерата, првиот познат акт на творештво, до денеска – уметноста е креативниот начин на ре-обмислување на светот.
Денес, ние стоиме пред најголемиот предизвик на човештвото – да ги направиме човековите права и слободи реалност. И – ја ставаме нашата дланка на лицето на светот и бараме права сега и за секој од нас.
Изрази се себе си! Не се колебај, не се плаши.
Ти растеш и се развиваш, оставаш траги на слободата и храброста зад себе.
Ти никогаш не си сам-а. Твоите мисли и твоите дела, твоите креации се твои придружници. Не ти се потребни признанија од оние што вршат злосторства над убавината, оние што не разбираат ништо поинакво од моќта на парите и насилството. Спротистави им се со креативноста и човечките вредности.