„Книгата на проминентниот новинар Бранко Тричковски ’Како бевме систематски уништувани од идиоти’ е прецизна хируршка вивисекција на секоја пора од нашиот живот, толку е болно отворањето очи што тој ни го прави на сите нас“.
Ова е пораката на промоторот Ѕвездан Георгиевски, кој вчера во Клубот на новинари во Скопје ја отслика четвртата збирка на колумни на Тричковски, што под заглавието „Офаманаман“ беа објавувани во неделниот магазин „Глобус“ во периодот од јуни 2011 до април 2013 година.
Според новинарот Георгиевски, станува збор за една од најдобрите книги на авторот, оти дава белег за едно спефицично време во кое живееме.
„Читањето на неговите колумни е школа за секој новинар и уживање во уметничка смисла. Станува збор за еден од најдобрите новинари, а ова дело го прави и еден од најзначајните колумнисти во земјава“, рече Георгиевски, нарекувајќи го Тричковски „новинар со идентитет, кој тешко проаѓа во нашата професија“.
Колумнистот Арсим Зеколи, споредувајќи со авторот со познатиот новелист и поет Чарлс Буковски, рече дека новата книга на Бранко Тричковски треба да се зачува за идните генерации. „Можеби ќе ја купите денеска, но само за да можете подоцна да сфатите што ни се има случено“, вели Зеколи.
Самиот автор, посетувајќи се на неодамнешен разговор со Зеколи, кој му укажал дека неговата книга е „многу политички некоректна“, рече дека ваквиот коментар го сфатил како врвен комплимент.
„Политичката некоректност во книгата не е инцидентна, импулсивна, туку има една систематичност која израснува во методолошка основа за тоа што го работам. Одредено ниво на политичка некоректност е услов да решиме дел од проблемите во земјава“, вели Тричковски и додава дека неговите книги содржат скица за сериозна радикална критика за македонското себепреиспитување.
Едно од најреномираните пера во земјава, Бранко Тричковски, е веќе 40-ина години во новинарските води. Роден е во 1952 година, а својата кариера ја почнува во 1975 година во весникот „Нова Македонија“. Тој е еден од основачите и прв главен и одговорен уредник на „Утрински весник“ во периодот од 1999 до 2003 година. Беше главен и одговорен уредник на магазинот „Глобус“, кој згасна пред две години, а сега излегува само интернет-изданието на неделникот.