Двојазичен прирачник за семејства на деца со аутистичен спектар на нарушување „Живот со аутизам – Предизвици и стратегии за поддршка“ денеска беше промовиран во кабинетот на претседателот на Република Северна Македонија. Прирачникот е резултат на долгогодишна посветена работа на авторите доц. д-р Стојан Бајрактаров, доц. д-р Насер Дурмиши, д-р сци Силвана Филипова и Билјана Крстевска-Кокорманова, а негови рецензенти се доц. д-р Ана Попоска, м-р Василка Галевска – Јовчевски и м-р Дита Торте – Чиче.

Во своето обраќање на настанот, сопругата на претседателот Елизабета Ѓоргиевска истакна дека овој прирачник може да им помогне на членовите на семејствата подобро да ги разберат децата и младите со аутистичен спектар на нарушување.

„Прирачникот е многу едукативен бидејќи содржи стратегии што можат да ја подобрат комуникацијата и интеракцијата со лицата со аутистичен спектар на нарушување. Наша должност, како општество, е да не забораваме ниту еден член на нашата заедница. Различностите не треба да бидат пречка, туку можност да се истражи потенцијалот што секој поединец го носи во себе и на таков начин да направиме простор да ги искаже секој од нас своите посебности и вештини, истакна сопругата на претседателот додавајќи дека најтопло ја препорачува оваа публикација не само на членовите на семејствата кои живеат со аутизмот, туку и на целата македонска јавност“, истакна Ѓоргиевска.

Целта на промоцијата е подигнување на јавната свест за да се влијае врз промената на ставовите на луѓето кон лицата кои се различни, како и создавање на еднакви можности за сите преку помош на стручните лица за доедукација за развивање на современи третмани, помош на родителите за прилагодување на условите во домот, помош на училиштата за подобрување на условите и квалитетот на едукацијата на овие лица и создавање на услови за нивна квалитетна инклузија во општеството.