Пронајденото 16-годишно момче, чие тело исплива во реката Пена, тетовско, сепак било убиено.
Веста произлезе од Основното јавно обвинителство Тетово кое утрово соопшти дека до надлежниот суд поднело барање за поведување подготвителна постапка против едно лице за кои постои сомнение дека сторило кривични дело убиство од член 123 став 1 од КЗ.

„Осомничената 17 годишна девојка со умисла лишила од живот дете на возраст од 16 години. По вербална расправија во автомобил кај местото викано Бањиче таа со остар предмет го удрила оштетениот во главата неколку пати, нанесувајќи му тешки телесни повреди опасни по живот. Потоа го турнала во реката Пена, а лицето било пронајдено починато по течението на реката. Надлежниот јавен обвинител до Судот достави предлог за определување мерка притвор“, велат од Обвинителството.

Претходно повеќе медиуми објавија изјава од адвокатот на девојката кој настанот го нарекува „трагичен“ и за семејството на убиеното момче но и за девојката која е осомничена во случајот. Таа, засега се наоѓа под психијатриско вештачење на кое е упатена по пронаоѓањето на мртвото момче.