Протест на околу 2.000 студенти во Белград пред министерството за образование против измените на Законот за високо образование усвоени на почетокот на септември.
Студентите се незадоволни поради помалиот број рокови за полагање и бараат да продолжи финансирање од буџетот на апсолвентскиот стаж, проблеми кои се јавија поради измените во Законот за високо образование.
И покрај разговорите со претставници на Министерството за образование, засега не е постигнат договор за барањата на студентите. Најавени се нови протести во понеделник, на 13 октомври.
Од српското Министерство пак велат дека е неразбирливо зошто студентите излегуваат на протести дури еден месец по усвојувањето на новиот закон и додаваат дека остануваат отворени за сите предлози.
Организаторите на протестот се Студентската конференција на универзитетите од Србија како чадор – организација на студентите, како и студентските парламенти на Универзитетот во Белград и Универзитетот за уметности.
Краткорочните барања на студентите се во учебната 2014/2015 година да се дозволат 6 задолжителни испитни рокови, а студентите кои се запишани во прва година во учебните 2010/2011, како и 2011/2012 да го задржат правото да бидат финансирани од буџетот најдолго до една година по истекот на редовниот рок за студирање, како што било и досега.
Долгорочните барања пак се да започне да се работи на нов Закон за високо образование со активно учество на студентските претставници, како и да се бараат долгорочни решенија за проблемот со квалитетот на наставата, обемните и недоволно дефинирани студиски програми и курсеви.