Покачување на платите, подобрување на условите за работа, неделите и празниците да бидат неработни денови, исплата на прекувремени часови, законски годишен одмор, исплата на полн износ на К-15, а не како досега по 100 денари и стоп за мобингот. Ова се барањата што ги испорачаа текстилните работници на денешниот протест во Штип што наиде на поддршка и од граѓани кои не се (ин)директно засегнати од проблемите во односната сфера.
Протестот што почна напладне во кругот на штипската конфекција „Астибо“ дојде како последица на неодамнешните желби на работодавачите за продолжување на работното време за пола час, замрзнување на придонесите и ангажман на празници за континуитет на производствениот процес.
Работниците ги оценија како апсурдни барањата на газдите и ги поткрепија со иронични пораки како „За нови џипови“, „За повеќе непријавени работници“ и „За работа на секој празник“.
Покрај текстилни работници од Штип, во улога на коорганизатори на протестот се јавија и нивни колеги од Кочани и Пробиштип. Поддршка добија од здружението „Гласен текстилец“ и од Хелсиншкиот комитет.