Весниците во Франција денеска не излегоа од печат поради штрајк на синдикатите во Франција против нацрт законот за труд.
Генералната конфередерција за труд на Франција (ЦГТ) донесе одлука за штрајк што е поддржан и од вработените во печатниците и во дистрибутивните центри во овој синдикат.
Весниците во вчерашните изданија ги информираа читателите дека поради штрајк нема да излезе од печат новото издание, но дека информациите ќе ги објавуваат преку интернет.
Откако беа усвоени реформите на законот за труд поради кои минатата година демонстрираа милиони Французи, владата одлучи да воведе измени на тој закон. Синдикатите се противат на одлуката тој да стапи на сила без притоа Парламентот да гласа за измените.
Целта на претседателот Емануел Макрон е на компаниите да им се даде поголема флексибилност и да ги охрабри да вработуваат, поради масовната невработеност која во Франција изнесува 9,5 проценти од работоспособното население, додека просекот во ЕУ е 7,8 проценти.Синдикатите стравуваат дека на овој начин ќе се намали сигурноста на работното место, и поради тоа повикаа на протести.
Но Макрон нема намера да попушти во врска со оваа реформа, која е едно од неговите предизборни ветувања.
Првите демонстрации на синикатот на работниците и конфередерациите против оваа реформа се одржаа на 12 септември и беа поддржани од 400.000 луѓе. Тоа беа први демонстрации на улиците откако Макрон ја презеде функцијата.
Демонстрациите продолжуваат денеска и во понеделник.