Повеќе од 20.000 луѓе се собраа на протестот против воведување на кирилица во Вуковар, јавуваат хрватските медиуми.
Во организација на Столб на одбраната на хрватскиот Вуковар, во центарот на градот во сабота се одржува протест под мотото „За хрватски Вуковар – не за кирилицата”, против воведување двојазичност во овој хрватски град.
Поддршка на вуковарци им дадоа и шибенчани кои се собраа покрај морето на помал собир.
Покрај вуковарци, на денешниот собир има многу граѓани од сите краишта на Хрватска, со поддршка на Столбот во кој членуваат многу воени ветерани, воени инвалиди, заробеници на српски логори, деца на загинати и исчезнати хрватски бранители, офицери на војската и полицијата, воени заповедници од татковинската војна на Хрватска кои денеска живеат во Вуковар, пренесува макфакс.
Собирот почна симболично во 12.05 часот, се интонираше хрватската химна и беше оддадена почит на загинатите со едноминутно молчење.
Од Владата на Хрватска меѓу другото се бара Вуковар да се изземе од Уставниот закон за правата на малцинствата или на воведување двојазичност во тој град да се стави мораториум од 50 години.
Посебно е обезбеден конзулатот на Србија сместен токму во овој хрватски град.
Можност за воведување кирилица во Вуковар се јави откако на пописот од 2011 година се покажа дека таму живеат 33 отсто Срби, а според Уставниот закон за правата на малцинствата, припадниците на тоа малцинство имаат право на рамноправна употреба на својот јазик.
Некои членови на хрватската Влада, вклучително и премиерот Зоран Милановиќ во неколку наврати потврдија дека во Вуковар ќе биде испочитуван законот на што се противат здруженијата на бранители