Симболично, во пет минути после 12 часот граѓанските организации излегоа пред Министерството за здравство на протестен марш против лошата политика на Владата и намалениот буџет за идната година.
„Бараме корекција на буџетот за 2017 година, двегодишно финансирање на терапија за ХИВ и шест месечно финансирање на програмите за превенција. Да се изнајде начин за финансирање на програми за групите под ризик за ХИВ за периодот од јули до декември 2017 година“ рече Силвана Наумова од Платформата за превенција и поддршка од ХИВ, пред Министерството за здравство.
По ова, активистите од граѓанските организации со транспаренти и цвеќе во раце се упатија кон скопскиот плоштад каде положија цвеќе, запалија свеќи и поставија импровизиран крст, кој ги симболизира починатите од СИДА и оние што во иднина ќе починат.
Незадоволството на граѓанските организации се однесува на намалениот буиџет за 60 проценти за 2017 година. Тие бараат државата итно да направи корекција на буџетот и да се изнајде механизам за финансирање на програмите наменети за ризичните групи, кои досега и опстојуваа со помош на меѓународни фондови.