Демонстрантите се упатија кон ЕУ Инфо центарот каде ќе порачаат дека не сакаат преговори помеѓу партиите. Претходно тие се преселија пред седиштето на Владата на Република Македонија преку Градскиот плоштад, каде што се пееше и се скандираше против претседателот Иванов и власта.
Демонстрантите им доставија и неколку прашања на полцииските сили кои го обезбедуваа Собранието.
Полицијата која пак ја обезбедуваше зградата на Владата, ги спушти штитовите пред граѓаните кои искажуваат револт.
-Го опљачкаа народот, ги аболицираа тие што го украдоа народот, сме станале како на времето Бугарија што беше, гладува народот, а они споменици ќе градат. Само местат меѓунационална омраза. За три марули ќе казнува човек а за милиони ќе аболицира, вели Али, еден од демонстрантите за НОВА.
-Јас сум Македонец а комшиите ми се Турци и сите се незадоволни а верувам и Албанците исто така. Груевски е ист како Чаушеску во Романија кога беше, вели Љупчо.
-Целосно ги поддржувам барањата на Протестирам, пред се запирање на аболицијата и оставка од Иванов, поддршка за СЈО и формирање на Специјален суд бидејќи овој е под контрола на власта. Преговорите во Виена се само продолжување на агонијата и нема да донесе никаква разврска, нема причина после 100ти пат да се преговара со врхушката на ВМРО, вели Васко, учесник во протестите.
Барањата на #Протестирам:
Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО);
– Итна и неотповиклива оставка на Ѓорге Иванов од функцијата Претседател на Република Македонија;
– Произнесување на Уставниот суд за уставноста на СЈО;
– Формирање на специјално одделение на Кривичниот суд, кое ќе биде надлежно за случаите под јурисдикција на СЈО;
– Итно повлекување на одлуката за одржување на парламентарни избори на 5 јуни;
– Задолжително вклучување и присуство на независни претставници на граѓанското општество во процесот на решавање на кризата;
– Формирање на преодна влада која докрај ќе ги имплементира итните реформски приоритети од извештајот на Прибе.