Државните медиуми во Сирија известуваат дека провладините сили вршат напади врз градот Кусеир, кој го држат бунтовниците и кој има стратешка позиција во близина на границата со Либан.
Ова аматерско видео, снимено во текот на викендот, покажува артилериски напади врз позициите на бутовниците.
„Асошиејтед Прес“ јавува дека 23 елитни борци на шиитската милитантна група Хизбула се убиени, додека се бореле раме до раме со сириските провладини трупи, а повеќе од 100 се повредени. Како голем сојузник на сирискиот претседател Башир Асад, Хизбула има интерес неговиот режим да опстане и затоа испраќа трупи преку граница како испомош на војската.
Сириската опсерваторија за човекови права, која ја следи војната во Сирија, извести и дека бунтовниците имале 50 жртви, вклучувајќи и двајца команданти.
Интензитетот на борбите покажува колку градот е важен и за двете страни зашто го спојува главниот град Дамаск со Медитеранот, област во која живеат Алавитите, секта на која и припаѓа и Башир Асад.
Кусеир, во кој мнозинството се Сунити, кои, пак, се спротивставуваат на владеењето на Асад, служи како место за трансфер на пратки со оружје и други добра, кои се шврецуваат од Либан за бунтовничките борци во Сирија.
Трупите на режимот и на Хизбула, извршија опсада врз Кусиер минатата недела и ги зазедоа селата во околината. Сега се смета дека во градот има околу 40.000 луѓе.
Војници на Хизбула вчера го окупираа центарот на градот во период од неколку часа, а денес борбите се префрлија во северниот дел. Официјалниот гувернер на бунтовничката провинција Хомс, кој е од страната на режимот, вели дека градот е веќе 60 отсто во рацете на војската, но бунтовниците, пак, велат дека војската не напредува, туку дека се уште се обидува да влезе во градот.