Новата варијанта на коронавирусот омикрон е потврдена денеска во Србија, пренесува „Нова.рс“.
Според овие информации, новиот сој на ковид-19 е потврден кај жена која пристигнала од јужноафриканската држава Боцвана.
Таа при влез во државата била негативна, меѓутоа дополнителните тестирања покажале дека е позитивна на омикрон.
– Пациентката беше во изолација. Земени се контролни примероци и еден од нив беше позитивен, објаснува професорката Тања Јовановиќ за српскиот портал „Нова“.
Според Јовановиќ, место за паника нема бидејќи, како што вели, состојбата со пациентката е под контрола.
По појавата на сојот омикрон првично во Јужна Африка, тој продолжи да се шири и во повеќе европски земји, но веќе е регистриран и во соседството. Хрватска и Црна Гора, исто така, ги потврдија првите случаи на омикрон, кој од денеска веќе го има и во Србија.
Омикрон засега не е регистриран во нашата држава.