Денеска во Отешево, на брегот на Преспанското Езеро, почнува снимањето на филмот „Деца на сонцето“ на режисерот Антонио Митрикески, тоа е негов трет игран филм, по „Преку езерото˝ од 1997 и „Како лош сон“ од 2003 година.
Планирано е филмот да се снима 36 работни дена во преспанскиот регион (Ресен, Отешево и Претор), и по неколку дена во Битола и Скопје.
Сценариото е на познатиот балкански автор Гордан Михиќ и е копродукција со Србија и Црна Гора. Македонски продукции се „Хоризонт филм“ и „Револушн продукција“.
Филмот е љубовна приказна во која главни ликови се Ангела и Марко, а нив ќе ги толкуваат младите Кире Ѓоревски, кој дипломирал во Бугарија, и Ивана Павлаковиќ, студентка на Факултетот за драмски уметности во Скопје.
Режисерот Митрикески вели дека филмот ќе биде приказна за прототипот на една македонска и балканска фамилија.
„Филмот ќе прикаже македонска фамилија преку која сакам да направам дијагноза на општеството, пресек на сите нивни страдања, илузии, премрежиња… Се трудам да го опфатам менталитетот на македонскиот народ, да не избегам од вистината која најмногу ме интересира во овој филм и затоа во него нема измислици“, вели Митрикески.
Во филмот ќе играат Владо Јовановски, Милица Стојанова, Мето Јовановски, Ацо Дуковски, Ѓорѓи Јолевски, Данчо Чевревски, Билјана Таневска, Камка Тоциновски, Мартин Мирчевски, Сашко Коцев и три деца. Новина е што Влатко Стефановски, кој е автор на музиката за филмот, првпат ќе има епизодна улога на филм и ќе го игра Човекот со гитара.
Директор на фотографија е Јарек Шода од Полска, колега на Митрикески од студентските денови на филмската академија во Лоѓ, со кого соработуваше и на својот претходен филм „Како лош сон“. Костимограф е Зорица Тодорова-Младеновиќ.