Поглаварот на Македонската православна црква – Охридска архиепископија (МПЦ-ОА), г.г. Стефан денеска бил примен од патријархот на Бугарската православна црква (БПЦ) Неофит, јави бугарската новинска агенција БГНЕС.
Ова е прва средба на двајцата поглавари откако БПЦ прифати да и биде мајка црква на МПЦ.
Архиепископот Стефан бил придружуван од митрополитот на преспанско-пелагониската епархија, Петар, одговорен за надворешните односи на МПЦ-ОА.
– Не е лесен крстот кој бугарската црква го има, бидејќи досега ништо не е сторено за проблемот со македонската архиепископија. Ајде сега, со Божјата премудрост, учесниците во меѓуцрковната комисија да го донесат резултатот што го сакаме, изјавил бугарскиот патријарх во емисијата „Вера и општество“.
Поглаварот на МПЦ, архиепископот Стефан се заблагодарил на сите во Бугарија кои ја поддржуваат желбата на МПЦ да добие признание за својата независност и истакнал дека писмото со барањето до БПЦ било едногласно прифатено од Синодот на Македонската православна црква.
– Писмото што го испративме до Бугарската патријаршија дека таа може да е наша црква-мајка едногласно е прифатено од нашиот Свет синод. Некои од соработниците можеби и имаат свое видување, но важно е што решава и вели мнозинството, изјави г.г Стефан.
Писмото со барањето од архиепископот на МПЦ- ОА, г.г. Стефан беше испратено од БПЦ на 9 ноември.