Годинашното издание на Рели Дакар ја однесе првата жртва. Застој на работата на срцето беше причина за смрт на португалскиот мотоциклист Пауло Гонкалвеш (40), кој важеше за една од иконите на традиционалното рели што оваа година се првпат се вози во Саудиска Арабија. Трагичниот настан се случи на 276 километар во рамки на седмата етапа, соопштија организаторите.
Прв напомош на Гонкалвеш ми пријде австрискиот колега Тоби Прајс кој возеше веднаш зад него, но, за жал, не можеше да стори многу за несреќниот Португалец. Медицинската екипа која беше довезена со хеликоптер го затекна без свест и со застој во работата на срцето. По неуспешната реанимација во леталото, на лекарите во болницата само им преостана да констатираат смрт.
Гонкалвеш настапуваше на Рели Дакар од 2о06 година. Четири пати завршуваше во топ 10, а во 2015 година го освои второто место во генералниот пласман.
„Ова е многу тежок удар. Пауло беше еден од најискусните мотоциклисти и едно од заштитните лица на ова рели“, изјави Дејвид Кастер, сопственик на лиценцата за Рели Дакар.
Гонкалвеш е 20-ти мотоциклист или вкупно 25 жртва на Рели Дакар што се вози од 1979 година. Последната несреќа со смртни последици се случи во 2015 година во Аргентина каде животот го загуби полскиот мотоциклист Михал Херник.