Првите количини на линдан од малата депонија во ОХИС ќе бидат извезени на 3 мај, порачаа од Министерството за животна средина при денешната посета во кругот на поранешниот хемиски гигант. Станува збор за 450 тони линдан и 150 тони на контаминирана почва. Транспортот ќе оди преку пристаништето во Солун, до крајната дестинација во Франција.
Работите во малата депонија во ОХИС почнаа во средината на март и според проектната динамика треба да завршат за 12 месеци. Она што било, можеби, изненадување досега при ископот е живата која е лоцирана на неколку места.
„Задоволни сме во секој случај од текот на работите. Досега се исчистени 450 тони чист отпад ХЦХ или народски кажано линдан и околу 150 контаминирана почва која ниско концентрирана. Во неколку точки се пронајдени колични на жива, земени се примероци и анализите потврдија присуство на жива. Количините се различни, но водиме сметка тоа да е во согласност со критериумите и барањата со капацитетите кои ќе го примат отпадот за уништување“, вели Сузана Андонова од Канцеларијата за неразградливи органски загадувачи (ПОПС) при Министерството за животна средина и просторно планирање.
Во малата депонија во ОХИС, според податоците на Министерството за животна средина од лани, има вкупно 6.661 тони отпад од кои 1.601 тони се ХЦХ, 4.060 тони контаминирана почва и 1.000 тони контаминиран бетон.
„Првите количини за извоз се предвидени за 3 мај, а сиот овој отпад се планира да се пакува во буриња овие денови кои ќе бидат сместени во седум контејнери. Целата количина не може одеднаш да биде транспортирана, затоа што самата постројка која што го третира овој отпад, односно акцелераторот во Франција, има лимитирачки количини кои што може да ги прими на месечно ниво. Затоа отстранување на отпадот ќе оди сукцесивно, дел по дел“, изјави Александар Мицковски од ПОПС.
Депонијата е покриена со шатор и во внатрешноста се поставени филтри за прочистување на воздухот, за што, како што наведуваат од Министерството кое беше домаќин денес на посетата на неколку новинари на отровната депонија, од страна на изведувачот на работите грчката компанија „Полиеко“ се запазени сите критериуми за заштита при работа, но и за животната околина.
„Преку малата депонија е подигнат шатор и во него е инсталиран негативен притисок. Атмосферскиот притисок е поголем од тој во шаторот, така што сите оние емисии кои што генерираат при ископувањето внатре во шаторот, не може да излезат надвор и да ја афектираат околината. Успешноста на овој систем е потврдена со редовните мониторинзи што се прават на амбиентниот воздух“, додаде Мицковски.
Постапката за дислокација на линданот е финансирана од Глобалниот еколошки фонд, македонската Влада, Кралството Норвешка и делегацијата на Европската Унија во земјава.
Сашко Димовски