Германската лабораторија „Кјурвак“ од јуни ќе започне со првите клинички испитувања за вакцината против ковид-19 во Германија и во Белгија, најави претседателот на Надзорниот Совет на компанијата, Жан Стефен.
Компанијата „Кјурвак“ соопшти дека најрано во јуни, најдоцна во јули, ќе ги тестира првите вакцини врз полнолетни и здрави лица кои не биле изложени на вирусот, потоа вакцината ќе биде инјектирана на веќе изложени лица и, конечно, на највозрасните луѓе во населението кои се и најризичната група.
„Целта е да се испита кој вид на антитела ќе бидат предизвикани од вакцината и да се разбере кој е имунолошкиот одговор кај луѓе што биле природно заразени“, изјави Стефен.
Тестовите ќе се вршат врз 2.000 до 3.000 лица во Белгија и Германија. „Кјурвак“ информира дека има уште две до три потенцијални вакцини во случај оваа да се покаже како неефикасна.