Рускиот претседател Владимир Путин го потпиша декретот за помилување на затворениот поранешен олигарх Михаил Ходорковски. Во соопштението на Кремљ се наведува дека декретот стапува во сила веднаш.
„Водени од принципите на хуманост, се потпиша декрет да се помилува осудениот Михаил Борисович Ходорковски, ослободувајќи го од понатамошно издржување на казната лишување од слобода“, пишува во текстот на указот.
Вчера Путин изјави дека помилувањето е поради хуманитарни причини, бидејќи мајка му на Ходорковски била болна.
Поранешниот шеф на компанијата „Јукос“ помина над 10 години во затвор по обвиненијата за финансиски измами и кражби. Ходорковски беше сметан за главен политички затвореник во Русија, а тој самиот секогаш тврдел дека обвиненијата против него се смислена и политички мотивирани, бидејќи тој беше противник на Путин.
Ходорковски oд затвор требаше да биде пуштен во август идната година.