За последните случувања во ФИФА, односно големите апсења кои се случија вчера и истрагата која Швајцарија ја започнува за Светските првенства во 2018 во Русија и 2022 во Катар под сомнение за поткуп, рускиот претседател Владимир Путин смета дека се притисок за одземање на Мундијалот од неговата земја.
– Како што знаеме сите, ФИФА бира нов претседател во петок а најверојатно Блатер ќе биде реизбран. Познато е дека е тој под голем притисок, а целта е на Русија да и се одземе организацијата на Светското првенство во 2018 година, изјави Путин, пренесува агенцијата Итар-Тас.
Тој смета дека ова е обид на САД да ја прошири својата јурисдикција во другите земји.
Апсењата кои беа извршени вчера од страна на швајцарската полиција, беа по налог на американските власти.
Швајцарците најавија дека започнуваат и истрага за основите под кои им е дадена организацијата на Мундијалот во 2018 и 2022 на Русија, односно Катар.
Уште во ноември минатата година, извештајот за корупција во ФИФА на американскиот истражител Мајкл Гарсија кој се однесува на Русија и Катар, по барањата на првиот човек на УЕФА Мишел Платини и други големи имиња во светот на фудбалот, им беа предадени на членовите на Извршниот комитет на ФИФА.
Со последните случувања и скандалот кој ја тресе ФИФА, се отвора можност за прегласување на одлуките за тоа кој ќе го организира Светското првенство во 2018 односно 2022 година.