Рускиот претседател Владимир Путин денеска одговараше на прашањата на руските граѓани за време на „Директната линија“ која директно се пренесува на руските телевизии и радија. Тој рече дека САД ги очекува истата судбина како СССР.
– На САД не им се потребни сојузници, туку вазали. Русија не се гледа себеси во таквиот систем на односи, рече Путин, додавајќи дека раководството на СССР по Втората светска војна со помош на сила го наметнувала сопствениот модел на земјите од источна Европа.
Според него, истото сега го прави САД.
Запрашан за инволвираноста на Русија во Украина, Путин ги отфрли сите обвиненија и рече дека не помогаат никој во источниот дел на земјата.
– Категорично отфрлам дека во Украина има руски војници, рече Путин.
Тој во своето обраќање рече дека ниту една закана не може да ја загрози Русија ако “народот се држи заедно и ако се одржува политичката стабилност“.
– Постојат многу закани кои не можеме да ги предвидиме, но ако ја одржиме актуелната политичка ситуација во земјата, ако општеството остане консолидирано, нема закана што може да нѐ загрози, кажа Путин.
Зборувајќи за убиството на опозиционерот Борис Немцов, Путин кажа дека со него бил во добри односи, иако често бил мета на неговите критики, а откри и дека руските разузнавачи и полицијата „во часовите по убиството веќе ги знаеле имињата на убијците“.
„Прашањето е како тие да се уапсат“, потенцираше Путин.