Економскиот напредок што Русија го постигна во последните 15 години може да исчезне до крајот на 2023 година, откако нејзината инвазија на Украина предизвика бројни санкции и повлекување на компаниите од земјата, според Институтот за меѓународни финансии, а пренесува Блумберг.
Економијата се очекува да се намали за 15 отсто во 2022 година, по што ќе следи пад од три отсто во 2023 година, оставајќи го бруто домашниот производ онаму каде што беше пред 15 години, вели економистот Бенџамин Хилгенсток истакнувајќи дека натамошните санкции можат уште повеќе да ги влошат прогнозите.
„Наглиот пад на домашната побарувачка веројатно ќе игра клучна улога, додека падот на увозот треба да се компензира со помал извоз, што би довело до маргинално позитивен придонес на нето странската побарувачка“, анализираат економистите. „Сепак, доколку се воведат дополнителни трговски санкции, извозот би можел да падне под она што го предвидуваат експертите“, додаваат.
Руската инвазија на Украина го поттикна падот на рубљата и ги фрли глобалните ланци на снабдување и цените на стоките во хаос, а исто така предизвика масовно повлекување на компаниите од земјата. Францускиот производител на автомобили Renault SA е меѓу последните компании кои се повлекоа, кој најави дека ќе престане со работа во својата фабрика во Москва и предупредува дека иднината на AvtoVAZ е неизвесна.
Покрај директниот удар врз руската економија, земјата со години ќе трпи и од таканаречениот „одлив на мозоци“ – егзодусот на образованите Руси од средната класа со финансиски средства да ја напуштат земјата – и од извозот од САД и ЕУ на технологија, вклучително и микроелектрониката кои можат со години да го попречат технолошкиот развој во Русија.
Истовремено, „самосанкционирањето“ на странските компании кои повеќе не сакаат да работат со Русија ќе ги ослабне важните сектори на руската економија, се вели во извештајот.
„Негативниот ефект врз среднорочните и долгорочните економски изгледи може да биде уште попогубен“, пишуваат економистите.