Денот на предавање на мандатот на партијата победник на изборите за формирање на новата бугарска Влада ќе биде познат кога партиите ќе гарантираат дека постигнале резултат во преговорите, искоментира бугарскиот претседател Румен Радев при неговата посета на Велико Трново, јави дописникот на МИА од Софија.
Според него, партиите мора да дадат јасни гаранции дека нема да отстапат од овој правец и дека и ќе создадат таква влада, која ќе биде обединета со приоритети и цели што се во интерес на бугарските граѓани.
Мотивите на привремените бугарски министри за внатрешни работи и за правда да побараат смена на главниот обвинител Иван Гешев се во одбрана на законот, а одлуката на Високиот судски совет да не го отстрани од функцијата е да се заштити статус кво-то, што беше одбиено од бугарскиот граѓани, рече Радев. нк/сд/
Во меѓувреме, Националниот совет на Бугарската социјалистичка партија, денска оддржува важен состанок на кој ќе присуствуваат не само високи претставници на бугарската левица, туку и коалициските партнери на БСП и каде ќе се разгледаат досегашните преговори меѓу БСП и претставниците на „Има таков народ“ и ќе се одлучи дали ќе продолжат разговорите меѓу двете заинтересирани страни.
Лидерката на БСП, Корнелија Нинова, денеска мора да добие мандат од Националниот совет на партијата за да ги продолжи преговорите со партијата на ТВ-презентерот Слави Трифонов и во каква форма ќе ја поддржат идната бугарска влада. Пленумот ќе го разгледа и прашањето за бараната оставка на Нинова од внатрепартиската опозиција поради губењето партиски гласови на предвремените парламентарни избори на 11 јули.
Се очекува денеска Нинова да го претстави планот за надминување на падот на Бугарската социјалистичка партија со сеопфатна објективна анализа и конкретни решенија за постигнување подобар резултат за левицата.