Хашкиот трибунал одлучи Радован Караџиќ, лидерот на Србите во Босна за време на граѓанската војна во 90-тите, е „одговорен за злосторства против човештвото“ како и за воени злосторства.
За случувањата во Сребреница дополнително ќе се одлучува, но и без нив, Караџиќ доби 40 години затвор, а целиот предмет се содржи во над 330.000 страници.
Тој беше обвинет по 11 точки: две точки за геноцид, пет точки за злосторства против човештвото и четири точки за прекршување на законите на војната во својство на претседател на Република Српска од 1992 година до 1996 година.
Според судијата О-Гвон Кон кој го водеше случајот, 44-месечната опсада на Сараево, исто така, се сведува на воено злосторство.
За настаните што се однесуваат конкретно на Сребреница – второто обвинение за геноцид – допрва треба да се донесе одлука.
Судијата веќе изјави дека Радован Караџиќ го наредил заземањето на босанскиот град пред трагичните настани од јули 1995 година, кога според босанските муслимани и западните влади, силите на босанските Срби убиле речиси 7.500 муслимански мажи и момчиња.
Денешната пресуда следува по речиси петгодишното судење на Караџиќ и седумте години затвор во Хаг.
Како врховен командант на армијата на босанските Срби во тоа време, Караџиќ беше обвинет дека е одговорен за голем број снајперски и артилериски напади врз населението на главниот град на Босна и Херцеговина, Сараево, за време на 44-месечната опсада.