„Денеска сте сведоци на еден многу мил настан кој за радовишани многу значи, а тоа е отворање на нов простор за венчавање кој што исто така ќе биде истовремено и мултифункционален. Односно во него ќе биде сместена и галерија, постојана галерија каде што уметниците ќе ги излагаат своите дела и каде што ќе креираат“, рече градоначалникот Ацо Ристов на отворањето на новата сала за венчавки.
Салата е направена на барање на граѓаните на општина Радовиш кои велат дека со години просторот за венчавање бил „понижувачки“ за место за одржување на убави настани како што е склучување на бракови, рече градоначалникот. „Сега го крстивме – Музеј на љубовта и уметноста затоа што овде ќе се склучуваат бракови, овде ќе се случуваат најубавите настани“, рече Ристов за салата која ќе служи и како галерија каде што локалните уметници ќе можат да ги изложуваат своите дела.
Радовиш денес доби и подновена централната градска улица која што е комплетно реновирана со сета урбана опрема и со сите инфраструктурни објекти.