Лајпциг ја плати сметката што во Скопје ја остави унгарски ФТЦ минатиот петок. Македонскиот женски ракометен првак го совлада бундеслигашот со 41:24 за прва радост во Лигата на шампиони во оваа сезона. Радичевиќ и Пенезиќ постигнаа по шест гола за домашниот тим, добра вечер имаше Сара Ристовска која заврши со пет колку и Хмирова. Миневскаја беше најефикасната гостинска ракометарка со, исто така, шест гола.
Вардар и Лајпциг одиграа еднонасочен натпревар во Скопје. На теренот во СЦ „Јане Сандански“ имаше една екипа, „црвено-црната“, кај која „запали“ и психолошкиот момент со Сергеј Самсоненко на клупата. Одиграа добар меч и во одбрана и во напад иако и овојпат примија 14 гола во едно полувреме. Но, за разлика од петокот, постигнаа 14 повеќе и примија, вкупно, три помалку.
И транзициите беа солидно изведени и во најголем дел презицно завршени. Лајпциг како да не знаеше каде се наоѓа и што се случува. Особено во вториот дел во кој во контрите од минута во минута ја параа противничката мрежа, а одбраната цврста, агресивна, за Германките гранитна. Одлична вечер имаа и голманките кои добија по едно полувреме. Лејно го заврши првото со 12 интервенции, Мајса Пешоа за првпат застана меѓу стативите во второто и на крај забележа 10 одбрани.
Вардар ќе биде лидер во групата Б барем до недела попладне кога ќе се комплетира второто коло со мечот во Будимпешта меѓу Ференцварош и Астраханочка. Следен ривал на „црвено-црните“ е Астрахан во Русија на 29 октомври.