Деведесет проценти од вкупно 958 лица вработени по Рамковен договор, опфатени со првата фаза за прераспределба во државните институции веќе ги потпишале решенијата, а од Владата очекуваат решенијата да ги потпишат и останатите 10 проценти.
Доколку не го сторат тоа наскоро, тие ќе бидат ставени на трансфер листа за втората фаза за кога е предвидена прераспределба на останатите од вкупно 1.600 вработени по овој основ.
Портпаролот на Владата, Мухамед Хоџа на денешната прес-конференција посочи дека од Секретаријатот за спроведување на Рамковниот договор, тие се систематизираат во други институции каде според анализата и планот на Секретаријатот, правичната застапеност не е на потребното ниво.
Одговарајќи на новинарско прашање дали со распределбата на овие вработени завршува процесот на вработување по основ на Рамковниот договор и правичната застапеност, Хоџа посочи дека откако ќе се заврши оваа обврска, ќе има нови огласи за вработувања доколку во одредени институции правичната застапеност не е исполнета.
Најголем број од административците кои биле вработени од 2008 до 2015 година од Секретаријатот за спроведување на рамковниот договор и кои не доаѓале на работа, а земале плата, во најголем дел ќе бидат распределени во Министерството за внатрешни работи каде што се планирани да заминат 50 лица. 39 лица ќе добијат шанса да работат во Управата за јавни приходи, 30 во Царината, во Клиничката болница во Тетово 28, во Управата за водење на матични книги и во Јaвното обвинителство по 26 лица. Во Министерството за надворешни работи ќе бидат вработени 19, во Министерството за образование 17, во Министерството за финансии 16, во Министерството за животна средина 11.
Во Генералниот секретаријат на Владата ќе се вработат 5 лица, во Службата за општи и заеднички работи 3 лица и во ЕЛЕМ – 5.
Околу 20 лица ќе се вработат во меѓуопштинските центри за социјални работи во Гостивар, Скопје, Тетово, а дел ќе најдат работа во скопските клиники – Нефрологија, Неврологија, Психијатрија, Радиологија, Кардиологија, Клиника за очни болести, за уво нос и грло ќе примат од еден до тројца административци.
Министерот за информатичко општество и администрација, Дамјан Манчевски неодамна изјави дека при распределбата на овие лица се водело сметка за потребите на институцијата и професионалните квалификации на вработените.
За прераспределбата на административците вработени по рамковен договор, нема да има нови трошоци од буџетот, вели Манчевски. Наместо платата да ја добиваат од Секретаријатот за Рамковниот договор како што било досега, ќе бидат исплатувани од институциите каде што ќе бидат распределени.